Mer informasjon
Kontrasten mellom den flate dalbotnen og dei stupbratte fjella, med fjorden som strekkjer seg innover i det grøne landskapet er noko av det som gjer naturen her inne så spesiell. National Geographic kåra i 2004 Sogn til det mest attraktive reisemålet i verda.
I Lærdal er me vande med å ta i mot reisande, og me reknar oss for å vera godt vertskap. Den viktigaste og mest nytta ferdslevegen mellom Bergen og Oslo har alltid gått gjennom Lærdal. Dette vitnar i dag fire parallelle vegar frå ulike tidsepoker om. Vegen som Harald Hårfagre nytta då han drog frå Valdres til Voss, som Olav den Heilage drog på gjennom dalføret på kristningsferda si år 1023 og som kong Sverre førte birkebeinarane sine på i 1177. Frå den gong til i dag har vegen gått frå kløvsti til Europaveg. Med Lærdalstunnelen, verdas lengste vegtunnel (24,5 km) som opna i år 2000, vart kommunen på ny knutepunkt i samferdsla. Les mer...
Om lag halvparten av dei 2150 innbyggjarane våre bur i kommunesenteret Lærdalsøyri. Her var det frå gamalt av ein strandstad, og heilt frå vikingtida, og fram til i dag eit viktig knutepunkt. Det aller meste av den dyrka jorda ligg i dag på flatene oppover dalen Lærdal og Borgund. Her er og busetjinga konsentrert.
I mellomalderen voks Lærdal seg naturleg fram som marknadsplass. På den gamle marknadsplassen på Lærdalsøyri møttes aust og vest. Frå Valdres og Hallingdal og frå dei yttarste fjordstroka kom folk for å bytte og handle varer. Det var etter det ein kan lese eit yrande liv med folk og dyr og varer. Kjøpeskålane vart mange og historia fortel både om kjærleik og slåssing. Den gamle Lærdalsmarknaden vart nedlagt i 1870-åra, men teken opp att i 1982 og vert no arrangert kvart år, i juni. I tillegg vert det i september/oktober arrangert haustmarknad, med vekt på sal av lokale produkt, frukt og grønsaker.
Landbruket har vore den viktigaste næringsvegen i kommunen. Me har spesielt gode vekstforhold. Poteter og grønsaker kjem tidleg i jorda og morelltrea vinn stadig nye areal. Bygdene i Indre Sogn har lite nedbør og har etter måten varme somrar. Kunstig vatning er i dag, og har vore, heilt naudsynt for god avling.
